Сойи Зарринруд аз ҳудуди шаҳри Истаравшан масоҳати зиёде тӯл кашида, дохили баъзе минтақаҳои он ба ҷойгиронии ғайрирасмии партовҳо мубадал мегардад. Сари вақт бартараф намудани партовҳои бесоҳиб зери назорати доимии кормандони мақомоти ҳифзи муҳити зист дар шаҳр қарор дошта, ҳар сол аксияҳои экологӣ ва ҳашару шанбегиҳо бо мақсади пешгирии ифлосшавии манбаъҳои обӣ гузаронида мешаванд. Бо чунин иқдоми бахши ҳифзи муҳити зист дар шаҳри Истаравшан давоми ҳафта дар доираи чорабиниҳои тоза кардани минтақаҳои дохили шаҳрии сойи Зарринруд аз партовҳои бесоҳиб ва ҷойҳои ботлоқшуда, 4 адад техникаи махсуси калонҳаҷм ва 1 адад техникаи КДФ «Хоҷагии манзилию коммуналӣ» ҷалб ва истифода гардид. Дар натиҷа 7 километр ҳудуд ва атрофи сой тоза карда шуда, 24 метри мукааб партовҳо ба партовгоҳи шаҳри Истаравшан интиқол дода шуд. Ба истиқболи ҷашнҳои миллии дар пешистода ва бо мақсади беҳбудӣ бахшидан ба вазъи экологӣ корҳои ободонӣ, бартараф намудани партовҳои бесоҳиб дар минтақаҳои ҷамоати шаҳрак ва деҳоти шаҳр, аз он ҷумла сойи Зарринруд идома меёбанд.

  Ҳангоми гузаронидани  амалиётҳои  назоратӣ, дар асоси нақшаи корӣ кормандони бахши ҳифзи муҳити зист дар шаҳри Исфара  дар  қадди роҳи Исфара – Лаккон худсарона бе иҷозати мақомоти дахлдор буриши 1 бех дарахти зардолуро ошкор намуданд. Нисбати қонуншикан – сокини шаҳри Исфара, ҷамоати Кулканд Икромов Содир  мутобиқи моддаи 242-и Кодекси ҳуқуқвайронкунии маъмурии Ҷумҳурии Тоҷикистон протокол тартиб дода шуда, ба маблағи 750 сомонӣ ҷарима  пешниҳод карда шуд.

  Бо мақсади сари вақт ошкор намудани қонуншиканиҳо, баланд бардоштани сатҳи масъулиятнокии ҳар як шаҳрванди ҷомеа  ва пешгирӣ намудан аз партофтани партов дар ҷойҳои ғайрирасмӣ дар кўчаҳои шаҳри Хуҷанд 8 адад камераҳои назоратӣ насб карда шудааст. Тибқи маълумоти шуъбаи ҳифзи муҳити зист дар шаҳри Хуҷанд давоми 2 моҳ барои дар ҷойи ғайрирасмӣ партофтани партовҳои маишӣ нисбати 15 нафар сокинони шаҳр бо моддаи 232 Кодекси ҳуқуқвайронкунии маъмурии Ҷумҳурии Тоҷикистон  протокол тартиб дода шуда, ба маблағи 5500 сомонӣ ҷарима ситонида шуд.

  Ҳамасола Академияи  миллии илмҳои Тоҷикистон, Институти зоология ва паразитологияи ба номи Е.Н.Павловский дар якҷоягӣ бо Иттиҳодияи ҳифзи табиат ва гуногунии биологии Тоҷикистон яке аз парандаҳои нодири Тоҷикистонро бо мақсади барқарор ва афзун намудани саршумори он парандаи сол интихоб менамоянд. Дар озмуни «Парандаи сол-2026», ки тариқи овозди -ҳии пинҳонӣ сурат гирифт, аз 10 номинатсияи парандагони пешни-ҳодшуда бо овозҳои бештар Чил (кабки биёбонӣ ё кабки зирак) парандаи соли 2026 интихоб гардид. Дар нашри сеюми Китоби сурхи Тоҷикистон дар  бораи парандаи Чил чунин маълумот дода шудааст: Чил ба қатори Мурғшаклон – Galliformes ва оилаи Тазарвҳо – Phasianidae дохил мешавад. Ба он ҳамчун намуди осебпазир мақом дода шуда, ба рӯйхати сурхи ИБҲТ (LC) ворид карда шудааст. Чил ё кабки биёбонӣ дар қисмати ҷанубӣ­ ғарбии Тоҷикистон паҳн гардида, дар пасткӯҳҳои Бобокӯҳ, Сафедкӯҳ, Рангонтов, Қаратови Панҷ, доманакӯҳҳои қаторкӯҳҳои Ҳисор ва шохаҳои ғарбии қаторкӯҳи Дарвоз маскан мегирад. Сарҳади шимолии паҳншавии намуд аз ҳудуди Тоҷикистон мегузарад. Муҳити писандидаи зисти намуди кабки зирак пасткӯҳҳои дорои растаниҳои сираки пистаю бодом, теппаҳои регӣ, харсангҳои на он қадар калон, биёбонҳо ва нимбиёбонҳо ба шумор мераванд.