Бо мақсади ҷалби таваҷҷуҳи аҳли ҷомеа ва пайвастани ҷавонон ба масъалаҳои ҳифзи гуногунии биологӣ ва ҳифзи муҳити зист бо иштироки намояндагони «Патрули сабз»-и 6 муассисаи таҳсилоти миёнаи умумии шаҳри Конибодом «Фестивали дўстдорони табиат» барпо гардид. Дар чорабинии мазкур беш аз 400 нафар мактаббачагон ширкат варзиданд. Дар рафти чорабинӣ макетҳо, расмҳо, ҳунарҳои дастӣ ва намоишҳо пешкаши иштирокчиён ва меҳмонон гардид, ки дар онҳо мушкилоти марбут ба ҳифзи гуногунии биологӣ, ҳифзи муҳити зист ва таъсири манфии фаъолияти инсон ба экосистема баён карда шудааст.    Қобили зикр аст, ки дар шаш мактаби ҷамоати деҳоти Пӯлотон, Фирӯзоба ва Патари шаҳриКонибодом соли 2022 корҳои мақсадноки иттилоотӣ - маърифатӣ оғоз гардида буд, ки дар натиҷа гурӯҳҳои «Нозирони сабз» таъсис ёфта, курси пурраи фанҳои таълимии иловагии экологӣ ба итмом расонида шуд.

  Бо мақсади тоза намудани манбаъҳои обӣ аз партовҳо,  амалигардонии нақшаи чорабиниҳо бахшида ба Даҳсолаи байналмилалии амал «Об барои рушди устувор, солҳои 2018-2028» ва баланд бардоштани маърифати экологии аҳолӣ дар соҳили дарёи Сир аксияи «Тозагии соҳил» гузаронида шуд. Дар аксия донишҷӯёни МДТ Литсейи касбӣ-техникии шаҳри Хуҷанд, кормандони маркази бемориҳои дил ва ҷарроҳии дилу рагҳои вилояти Суғд ва беморхонаи физиотерапевтӣ зиёда аз 300 нафар иштирок намуда, ду тарафи соҳили дарё аз партовҳои маишӣ, пластикӣ ва алафҳои бегона ба микдори 5 м 3 тоза карда шуд.

  Бо мақсади зиёд намудани саршумори моҳиҳо дар давраи манъи сайди моҳӣ, эмин нигоҳ доштан ва зиёд намудани саршумори онҳо, таъмини онҳо бо ғизо бо иқдоми шуъбаи ҳифзи муҳити зист дар ноҳияи Бобоҷон Ғафуров дар обанбори Баҳри тоҷик (ҳудуди ноҳия) корҳои биотехникӣ гузаронида шуд. Дар ин мавзеъ ба миқдори умумии кунҷора - 150 кг ва гандумрезаҳои гуногун - 150 кг пошида шуда, рафти корҳо тариқи телевизиони вилояти Суғд намоиш дода шуд.

  Бо мақсади баланд бардоштани маърифатнокии аҳолӣ доир ба муҳити зист ва тарғиби эълон гардидани соли 2025 «Соли байналмилалии ҳифзи пирьяхҳо» насби овезаҳои экологӣ дар вилояти Суғд идома дорад.Чунин овеза аз ҷониби бахши ҳифзи муҳити зист дар шаҳри Истиқлол дар яке аз кӯчаҳои марказии шаҳр - Маҳаллаи 1 ва кучаи марказии ба номи Шириншоҳ Шотемур насб карда шуд.

  Баҳри иҷрои барқияи Кумитаи ҳифзи муҳити зисти назди Ҳукумати Ҷумҳурии Тоҷикистон дар кӯчаи марказии Исмоили Сомонӣ,  ҷамоати деҳоти  Шарипов деҳаи Кучкак шаҳри  Конибодом    баннерҳои экологӣ насб карда шуд, ки мавзӯи асосӣ - ин аз ҷониби СММ эълон гардидани соли 2025 ҳамчун «Соли байналмилалии ҳифзи пирьяхҳо» мебошад. Солҳои охир насби чунин овезаҳои экологӣ ба ҳукми анъана даромада, боиси баланд бардоштани маърифати экологии аҳолӣ мегардад.