Бо мақсади тозаву обод нигоҳ доштани муҳити атроф, беҳбудӣ бахшидан ба вазъи санитариву экологӣ, эмин нигоҳ доштани аҳолӣ аз ҳар гуна касалиҳои сироятӣ аз ҷониби КВДК «Хизматрасонии нақлиёти санитарии шаҳри Хуҷанд» дар кӯчаву хиёбонҳои шаҳр 60 адад қуттиҳои партов нав карда шуданд. Боиси зикр аст, ки дар шаҳр 175 адад нуқтаи партов бо 780 адад қуттиҳо мавҷуд буда, тибқи нақша дар вақти муайянгардида гирифта шуда, мавзеъҳои мазкур мунтазам безарар гардонида мешаванд. Дар миқёси тамоми шаҳр низ иваз намудани қуттиҳои партов дар назар аст.
Амалиётҳои шабонарӯзӣ дар шаҳри Хуҷанд
Тибқи маълумоти шуъбаи ҳифзи муҳити зисти шаҳри Хуҷанд, ҳангоми гузаронидани амалиёти шабонарӯзӣ муайян гардид, ки дар кӯчаву хиёбонҳои марказии шаҳри Хуҷанд аз тарафи КВДК ХНС-и шаҳр тибқи ҷадвали тасдиқшуда дар мӯҳлати муайянгардида партовҳо гирифта мешаванд. Амалиёти мазкур махсусан дар фасли тирамоҳ бо мақсади пешгирӣ намудани ҳодисаҳои сӯзонидани барги дарахтон ва партовҳои истеъмолӣ роҳандозӣ гардида истодааст.
Амалиёти “Ҳавои тоза” дар нуқтаҳои санҷиши техникӣ
Дар асоси нақшаи кории шуъбаи назорати давлатии истифода ва ҳифзи ҳавои атмосфераи Раёсат, бо мақсади кам намудани ихроҷи моддаҳои зараровар ба ҳавои атмосфера дар нуқтаҳои санҷиши техникии шаҳрҳои Хуҷанд, Бӯстон ва ноҳияи Б.Ғафуров амалиёти «Ҳавои тоза» гузаронида шуд. Дар рафти амалиёт 73 адад нақлиётҳои автомобилии тамғаашон гуногун аз санҷиши аналитикӣ гузаронида шуда, муайян гардид, ки меъёри стандартҳои давлатӣ вайрон карда нашудаанд.
Вохӯрӣ дар ноҳияи Ҷаббор Расулов
Бо мақсади гузаронидани корҳои ташвиқотиву тарғиботӣ, бо икдоми бахши ҳифзи муҳити зисти ноҳияи Ҷ.Расулов дар ҷамоати деҳоти ноҳияи Ҷ.Расулов бо кормандон ва сокинони фаъоли ҷамоат вохӯрӣ доир гардид. Кормандони бахш ба ҳозирин дар мавзӯи пешгирии ғайриқонунии шикори ҳайвонот дар мавсими шикор, масъалаҳои партов, пешгирӣ намудани ҳодисаҳои сӯзонидани барги дарахтон, саҳми сокинони маҳаллаҳо дар тозаву обод намудани муҳити атроф баромад намуданд.
Аксияи «Тозагии соҳил» дар н.Спитамен
Бо икдоми Раёсати ҳифзи муҳити зисти вилояти Суғд дар ҳамкорӣ бо Ташкилоти байналхалқии«Лоиҳаи миллии идоракунии захираҳои обӣ» (giz) дар доираи чорабиниҳо бахшида ба эълон гардидани Даҳсолаи байналмилалии амал «Об барои рушди устувор», солҳои 2018-2028, дар сохили дарёи Оқсу, канали байнихоҷагӣ, сойи Оқсу, ҷамоати деҳоти Сарбанд бо иштироки 160 нафар сокинон аксияи «Тозагии соҳил» гузаронида шуд. Иштирокчиёни аксия аз ҷониби Ташкилоти байналхалқӣ бо дастпӯшак ва халта барои партов-ҷамъкунӣ таъмин карда шуданд. Рафти аксия 2 км сой аз партовҳои ҳархела, алафҳои худрӯйи хушкшуда тоза карда шуда, партов ба миқдори 5 м3 ба партовгоҳ бароварда шуд.
Амалиётҳои назоратӣ дар мавсими шикор
Бо мақсади ҳифз ва нигоҳдории олами хайвонот, тибқи фармоиши сардори Раёсат таҳти № 64 аз 28.10.2020 «Оид ба гузаронидани амалиётҳои шабонарӯзӣ баҳри ҳифзи олами ҳайвонот дар мавсими шикор» аз тарафи нозирони шуъбаи ҳифзи олами наботот, ҳайвонот ва захираҳои моҳии Раёсати ҳифзи муҳити зисти вилоят дар мавзеи Хуррамдараи ноҳияи Шаҳристон ҳангоми ғайриқонунӣ доштани паррандаи намуди саъба бо лавозимоти ғайриқонунӣ - тӯри махсусгардонидашуда ва «чакас» сокинони ноҳияи Шаҳристон ва шаҳри Истаравшан Иброҳимов Т., Додоев А. ва Юсупов М. боздошт гардиданд. Нисбати қонуншиканон протоколҳои ҳуқуқвайронкунии маъмурӣ тартиб дода шуда, барои андешидани чораҳои маъмурӣ ба бахшҳои ҳифзи муҳити зисти ноҳияҳо фиристода шуд. Олоти шикорӣ муваққатан мусодира карда шуда, 10 сар паррандаи саъба ба муҳити табиӣ сар дода шуд.
Страница 125 из 236