Баҳри татбиқи «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020», дар Муассисаи давлатии таълимии Коллеҷи тиббии шаҳри Истаравшан санаи 30 октябри соли равон вохӯрии намояндаи Раёсати ҳифзи муҳити зисти вилояти Суғд бо донишҷўён доир гардид. Бо сухани ифтитоҳӣ намояндаи коллеҷи мазкур баромад намуда, оид ба масъалаҳои экологӣ, истифодаи самаранок ва ҳифзи захираҳои табиӣ, зарурияти тарбия ва маърифати экологии ҷавонон изҳори ақида намуд. Дар навбати худ, аз тарафи намояндаи Раёсат оид ба масъалаҳои ҳифзи муҳити зист дар бораи «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020», мавқеи тарбия ва маърифати экологии аҳолӣ, чораҷўиҳо барои ҷойгиронии ғайрирасмии партовҳо дар асоси Кодекси ҳуқуқвайронкунии маъмурии Ҷумҳурии Тоҷикистон, нашри дуюми Китоби Сурхи Ҷумҳурии Тоҷикистон ва дигар масъалаҳои вобаста ба муаммоҳои экологӣ баромад пешкаши иштирокчиён гардид.

Раёсати ҳифзи муҳити зисти вилоят баҳри иҷрои қарори Раиси вилоят ва дар доираи 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон, бо мақсади тозаву озода нигоҳ доштани муҳити зист дар шаҳру ноҳияҳои вилоят аксияи «Тозагии маҳал»-ро гузаронид. Дар маҷмуъ давоми моҳи октябри соли равон 4 маротиба дар маҳалҳои аҳолинишин, муассисаҳо, ташкилотҳо, ҷамоатҳои шаҳрак ва деҳоти шаҳру ноҳияҳо, махсусан мавзеъҳои ҷойгиршавии партовгоҳҳои расмӣ ва партовҳои бесоҳибу гирду атрофи он ташкил ва гузаронида шуд.

   Дар аксияҳои  мазкур зиёда аз 4,2 ҳазор нафар кормандони ташкилоту муассисаҳо, аҳолии ҷамоатҳои шаҳрак ва деҳот, хонандагон ва донишҷўёни муассисаҳои таълимию тандурустӣ фаъолона иштирок доштанд. Дар рафти аксия 2,1 ҳазор бех дарахтон ва гулу гулбуттаҳо шинонида шуда, каналу ҷўйбор, заҳбуру латокҳо ба масофаи 6 км тоза карда, 3,3 ҳазор метри мураббаъ майдонҳо аз алафҳои бегона, 1,8 км соҳили дарё ва 5,7 км қадди роҳҳо аз партовҳо тоза ва беш аз 128,2 метри мукааб партовҳо дар партовгоҳҳои расмӣ ҷойгиронида шуданд.

Санаи 26 октябри соли равон бо ташаббуси ташкилоти байналхалқии САҲА  дар  комплекси “Хушбахти” шаҳри Хуҷанд семинари омузишӣ оид ба пешбурди принсипҳои “Иқтисоди сабз” ва энергияи каммасраф баргузор гардид. Дар семинари мазкур намояндагони мақомоти ҳифзи муҳити зисти вилоят ва шаҳру ноҳияҳо, саноат ва энергетика, кишоварзӣ, ташкилотҳои ҷамъиятӣ ва воситаҳои ахбори омма иштирок доштанд. 

   Намояндаи Дафтари САҲА Саулюс Смалис  аз мақсад ва ҳадафи баргузории тренинги мазкур иштирокчиёнро шинос намуда, дар рафти чорабинӣ оид ба мафҳумхои умумии “Иқтисоди сабз”, мисолҳои мушахасси мавзуъ, “Иқтисоди сабз” дар Тоҷикистон ва дигар масъалаҳои марбута баромад намуд.

Дар доираи 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон, бо мақсади тозаву озода нигоҳ доштани муҳити зист ва бахшида ба идҳои миллии дарпешистода  дар мувофиқа бо мақомотҳои иҷроияи ҳокимияти давлатии шаҳрҳои Хуҷанд ва Гулистон дар соҳили дарёи Сир ва обанбори “Баҳри тоҷик”  аксияҳои “Тозагии соҳил” ва “Тозагии маҳал” гузаронида шуд. Дар чорабинии мазкур беш аз 500 нафар, аз он ҷумла омӯзгорон, хонандагони мактабҳои таҳсилоти миёнаи умумии № 13, сокинони маҳаллаи “Дӯстии халқҳо”, коллеҷи омӯзгории ш.Хуҷанд ба номи академик Б.Ғафуров,  МТМУ №№ 1, 14 ва гимназияи № 1- и ш.Гулистон иштирок доштанд.

    Дар натиҷаи аксияҳо кади роҳҳои мошингард, ҷуйборҳо аз алафҳои бегона, дарахтони хушкшуда тоза карда шуда, каналу соҳили обанбор аз партовҳо тоза карда шуданд  ва 14 м3 партовҳо ба партовгоҳҳои  шаҳрӣ бароварда шуданд.