Бо мақсади таъмини иҷрои бандҳои нақшаи чорабиниҳои татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025» дар давоми 3 соли охир Сарраёсати ҳифзи муҳити зист дар вилояти Суғд якҷоя бо Ташкилоти ҷамъиятии «Гурӯҳи ҷавонон оид ба ҳифзи муҳити атроф» дар 6 муассисаҳои таҳсилоти миёнаи умумии шаҳри Истиқлол бо омӯзгорони фанни экология, биология ва хонандагон ҳамкорӣ менамояд. Боиси қайд аст, ки дар ин давра раванди «Нозирони сабз»-и муассисаҳои таълимии мазкур таъсис ёфта, як қатор чорабиниҳои гуногуни ба рушди тарбия ва баланд бардоштани донишҳои экологӣ нигаронида, гузаронида шудааст. Бахшида ба Рӯзи умумиҷаҳонии замин ва дар арафаи ҷашни Рӯзи Ғалаба дар Ҷанги бузурги Ватанӣ, бо иштироки дастаҳои «Нозирони сабз»-и муассисаҳои таълимӣ дар минтақаи атрофи маҳалаи 1-уми шаҳри Истиқлол аксияи экологии «Тозагии маҳал» баргузор гардид.

  Дар толори факултети молия ва андози Донишгоҳи давлатии ҳуқуқ, бизнес ва сиёсати Тоҷикистон бахшида ба эълон гардидани соли 2024 - «Соли маърифати ҳуқуқӣ» ва соли 2025 - «Соли байналмилалии ҳифзи пиряхҳо» дар доираи «Ҳафтаи кафедраи забони русӣ - 2024» чорабинии илмию тарбиявӣ таҳти унвони «Муаммоҳои экологии замони муосир ва муҳимияти баланд бардоштани маърифати экологии ҷавонон» баргузор гардид. Тибқи дархости Раёсати факултети молия ва андози донишгоҳи мазкур барои мақсаднок гузаронидани вохӯрӣ бо донишҷӯёну устодон намояндаи Сарраёсати ҳифзи муҳити зист дар вилояти Суғд иштирок намуд. Дар маҷмӯъ, дар чорабинӣ беш аз 60 нафар донишҷӯёни курси 1 ва 2-и ихтисосҳои вобаста ба ҳуқуқшиносӣ ва дигар, инчунин 10 нафар устодон иштирок дошта, дар давоми ду соат ҳам бо забони давлатӣ ва ҳам бо забони русӣ ба онҳо дар бораи мақсади эълон гардидани соли 2024 - «Соли маърифати ҳуқуқӣ», ки дар Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ қайд карда шуд, омилу сабабҳои эълон гардидани соли 2025 - «Соли байналмилалии ҳифзи пиряхҳо», муаммоҳои ҷаҳонии экологии замони муосир, муҳимияти қабули «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025», таъсири тағйирёбии иқлим ва роҳҳои мутобиқшавӣ ба он, муаммоҳои мубрами экологӣ дар самтҳои ҳифзи муҳити зист ва боз як қатор маълумоти вобаста ба рушди тарбия ва баланд бардоштани маърифати экологии ҷавонон маълумот пешниҳод гардид.

   Тибқи нақшаи кории Сарраёсати ҳифзи муҳити зист дар вилояти Суғд барои нимсолаи якуми соли 2024 ва нақшаи кории Комиссияи байниидоравии давлатӣ оид ба маърифати экологии аҳолӣ дар вилоят барои соли 2024 рафти иҷрои қарори Раиси вилоят аз 22.11.2021, № 442 «Дар бораи Комиссияи байниидоравии давлатӣ оид ба маърифати экологии аҳолӣ», аз он ҷумла фаъолияти Комиссияи минтақавии мақомоти иҷроияи ҳокимияти давлатии ноҳияи Зафаробод мавриди санҷиш қарор дода шуд. Ҳамзамон, доир ба рафти иҷрои қарори Раиси вилоят аз 26.05.2021, № 274 «Дар бораи татбиқи Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» омӯзиш ва таҳлили маводи сохторҳои мақомоти иҷроияи ҳокимияти давлатии ноҳия, ки ба иҷрои бандҳои нақшаи чорабиниҳо вобаста мебошанд амалӣ гашта, инчунин бо ҳар як роҳбару шахси масъул сӯҳбат ва барои вусъат бахшидани беҳбудӣ ба корбарии минбаъда дар самти мазкур тавсияҳо пешниҳод гардид.

 Тибқи нақшаи пешбинигардида ва дар доираи талаботи бандҳои нақшаи чорабиниҳои татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025», дар синфи экологияи МДТ «Коллеҷи политехникии ноҳияи Зафаробод» бо хонандагон ва омӯзгорони фанни экология ва биология вохӯрӣ доир гардид. Дар рафти мулоқот намояндаи сарраёсат баромад намуда, оид ба нуқтаҳои Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ вобаста ба соҳаи ҳифзи муҳити зист,дар бораи мақсади Барномаи давлатӣ, мавқеи тарбия ва маърифати экологии аҳолӣ, масъалаҳои зарурияти тарбия ва баланд бардоштани маърифати экологии ҷавонон, муаммоҳои экологии ҷаҳонии замони муосир, чораҷӯиҳо барои вайрон кардани талаботи қонунҳои амалкунандаи Ҷумҳурии Тоҷикистон дар соҳаи ҳифзи муҳити зист, нашри дуюми Китоби Сурхи Ҷумҳурии Тоҷикистон ва дигар масъалаҳои вобаста ба мавзӯъ изҳориақида намуд.