Д
ар лагери байналмилалии кӯдаконаи «Шоҳин»-и шаҳри Гулистон бо иштироки намояндагони ҳаракати «Нозирони сабз» аз муассисаҳои таҳсилоти миёнаи умумии 15 шаҳру ноҳияҳои вилояти Суғд 12-умин лагери экологӣ «Хонаи сабзи мо – 2025» бомуваффақият анҷом ёфт. Дар лагери мазкур 40 нафар хонандагон – аъзоёни фаъоли ҳаракати «Нозирони сабз» ширкат варзиданд, ки дар давоми як ҳафта барномаи омӯзишиву амалӣ ва фароғатиро гузашта, донишу маҳорати нави худро тақвият бахшиданд. Тибқи барномаи лагери экологӣ иштирокдорон бо тренингҳо оид ба экология, гуногунии биологӣ, самаранок истифода бурдани об кори даставӣ ва роҳбарӣ, аксияҳои экологӣ ва чорабиниҳои варзишиву эҷодӣ, машғулиятҳои амалӣ оид ба таҳияи ташаббусҳои худӣ, сафарҳои омӯзишӣ ба ҷангали тӯқайзори шаҳри Конибодом, Донишкадаи кӯҳӣ-металлургии Тоҷикистон ва қасри таърихии «Арбоб» машғул шудаанд. Яке аз натиҷаҳои муҳимтарини лагер дар он буд, ки аъзоёни ҳаракати «Нозирони сабз» нақшаи фаъолияти худро барои солҳои 2025–2026 таҳия ва ба шарикони рушд муаррифӣ намуданд. Нақша аз се самти асосӣ иборат буда, чорабиниҳои таълимӣ, аксияҳои амалӣ ва корҳои иттилоотиву маърифатиро дар бар мегирад.
Ин барнома минбаъд такмил дода шуда, дар доираи «Форуми сеюми ҷавонони ҳавзаи дарёи Сир» муаррифӣ карда мешавад. Дар ҳамкорӣ бо шарикони рушд, хусусан дар доираи лоиҳаи GIZ «Идоракунии захираҳои об дар Осиёи Марказӣ бо назардошти таъсири иқлим», дар рафти лагери экологӣ бахшида ба Рӯзи дарёи Сир озмун эълон гардида, иштирокчиён дар се номинатсия — расм, иншо таҳти унвони «Сирдарё – дарёи ҳаёт» ва наворҳои кӯтоҳ ҳунару истеъдоди худро нишон доданд. Ғолибон дар маросими ҷамъбастӣ бо тӯҳфаҳои хотиравӣ сарфароз гардонида шуданд. Лагери «Хонаи сабзи мо» бори дигар собит сохт, ки ин як майдони самарабахши тарбия ва худшиносии экологии ҷавонон аст. Дар рафти чорабинӣ иштирокдорон меомӯзанд, ки дар баробари ҳифз кардани табиат, онҳо бояд ташаббусҳоеро роҳандозӣ намоянд, ки минбаъд ба рушди устувори минтақа саҳми арзанда гузорад. Боиси қайд аст, ки лагери мазкур дар ҳамкорӣ ва мусоидати Сарраёсати ҳифзи муҳити зист дар вилояти Суғд, Раёсати маорифи вилоят, ТҶ «Гурӯҳи ҷавонон оид ба ҳифзи муҳити атроф» ва бо дастгирии шарикони рушд - GIZ, Green Central Asia, Darwin Initiative, Fauna & Flora, Бонки «Арванд» баргузор гардид.